शनिवार साँझ आयोजना हुने फिनालेका लागि काठमाडौंस्थित भव्य तथा आकर्षक स्थल रामालयलाई कार्यक्रमको मुख्य भेन्युका रूपमा छनोट गरिएको छ ।
विशेष वास्तुकला, आकर्षक आन्तरिक सजावट, विलासी वातावरण तथा फराकिलो कार्यक्रमस्थलका कारण रामालयले फेसन फिभरको ग्राण्ड फिनालेका लागि विशेष माहोल तयार गर्ने आयोजकको विश्वास छ । रामालयको भव्य बाहिरी संरचना, सुन्दर बैंक्वेट हल, आकर्षक डाइनिङ स्पेस तथा हरियालीले घेरिएको रमणीय कोर्टयार्डले कार्यक्रमलाई थप आकर्षक बनाउने छ ।
आधुनिक शैली र राजसी वातावरणको मिश्रण रहेको रामालयको परिवेश ‘फेसन फिभर सिजन २’ को अवधारणासँग समेत मेल खाने आयोजकको भनाइ छ । फिनालेमा विभिन्न नयाँ मोडल, डिजाइनर, फेसन ब्रान्ड, सिर्जनशील क्षेत्रका व्यक्तित्व तथा विशिष्ट अतिथिहरूको सहभागिता रहने छ ।
फेसन फिभर २ को आयोजक संस्थाले जनाए अनुसार रामालयले फिनालेका लागि भेन्यु उपलब्ध गराउनुका साथै फेसन फिभरको यात्रामा मोडलहरूको ओरिएन्टेसन तथा प्रशिक्षण गतिविधिका लागिसमेत स्थान उपलब्ध गराउँदै सहयोग गरेको छ । यसले प्रतियोगितामा सहभागी मोडलहरूलाई ग्राण्ड फिनालेका लागि आवश्यक तयारी गर्न थप सहज भएको आयोजकको भनाइ छ ।
‘फेसन फिभर सिजन २’ ले नयाँ प्रतिभालाई आफ्नो क्षमता प्रस्तुत गर्ने अवसर प्रदान गर्नुका साथै फेसन उद्योगमा सक्रिय व्यावसायिक व्यक्तिहरूसँग जोडिने र आफ्नो करियरलाई अगाडि बढाउने प्लेटफर्मका रूपमा आफूलाई स्थापित गर्ने लक्ष्य लिएको छ ।
रामालयको भव्य पृष्ठभूमिमा आयोजना हुन लागेको यसपटकको ग्राण्ड फिनालेमा रनवे फेसन, नयाँ प्रतिभा र नेपाली सिर्जनशील उद्योगको सम्भावनालाई एकै मञ्चमा प्रस्तुत गरिनेछ । आयोजकका अनुसार कार्यक्रमले नेपाली फेसन क्षेत्रमा उदाउँदै गरेका प्रतिभालाई थप उजागर गर्ने अपेक्षा गरिएको छ ।
‘फेसन फिभर सिजन २’ उदाउँदै गरेका प्रतिभालाई स्पटलाइटमा ल्याउने मञ्चका रूपमा ग्राण्ड फिनालेको तयारीमा छ ।
